રાકેશ ટિકૈતની પ્રેસ-કોન્ફરન્સમાં હોબાળો: ખેડૂતનેતા રાકેશ ટિકૈત પર શાહી ફેંકવામાં આવી, સમર્થકોએ આરોપીને પકડીને માર માર્યો
- આ ઘટના બાદ ત્રણ લોકોને કસ્ટડીમાં લેવામાં આવ્યા છે
કર્ણાટકની રાજધાની બેંગલુરુમાં ખેડૂતનેતા રાકેશ ટિકૈત પર શાહી ફેંકવામાં આવી હતી. પત્રકાર પરિષદ દરમિયાન ધક્કામુક્કી બાદ આ ઘટના બની હતી. આ પછી રાકેશ ટિકૈતના સમર્થકોએ આરોપીને પકડીને માર માર્યો હતો. કાર્યક્રમમાં એકબીજા પર ખુરશીઓ પણ ફેંકવામાં આવી હતી. હાલની માહિતી મુજબ આ ઘટના બાદ ત્રણ લોકોને કસ્ટડીમાં લેવામાં આવ્યા છે.
ટિકૈત અને ચંદ્રશેખરના સમર્થકો વચ્ચે ખુરશીઓ ઊછળી :-
સ્થાનિક મીડિયા અનુસાર, ટિકૈત પર શાહી ફેંક્યા બાદ તેમના સમર્થકોએ તે વ્યક્તિને ઝડપી લીધી હતી. આ પછી ચંદ્રશેખરના સમર્થકો અને રાકેશ ટિકૈતના સમર્થકો વચ્ચે ખુરશીઓ વડે મારામારી થઈ હતી.
ચંદ્રશેખરના સમર્થકો પર આરોપો :-
કહેવામાં આવી રહ્યું છે કે આ શાહી સ્થાનિક ખેડૂતનેતા કે ચંદ્રશેખરના સમર્થકોએ ફેંકી હતી. ત્યાં હાજર લોકોએ જણાવ્યું હતું કે જ્યારે પત્રકાર પરિષદ દરમિયાન પત્રકારોએ ટિકૈતને પૂછ્યું કે ખેડૂતનેતા ચંદ્રશેખર વિશે તમારું શું કહેવું છે? આ મુદ્દે જવાબ આપતાં ટિકૈતે કહ્યું હતું કે અમારે તેની સાથે કોઈ લેવાદેવા નથી. આ સાંભળીને ચંદ્રશેખરના સમર્થકો ગુસ્સે થઈ ગયા અને ટિકૈત પર શાહી ફેંકી હતી.
મને કોઈ સુરક્ષા આપવામાં આવી ન હતી :-
રાકેશ ટિકૈતે કહ્યું હતું કે અહીં સ્થાનિક પોલીસ દ્વારા કોઈ સુરક્ષા આપવામાં આવી ન હતી. આ સરકારની મિલીભગતથી કરવામાં આવ્યું છે.
